ਨਿਊਯਾਰਕ/ਪੰਜਾਬ ਪੋਸਟ
ਪੈਰਿਸ ਓਲੰਪਿਕ ਦੇ ਚਾਂਦੀ ਤਗਮਾ ਜੇਤੂ ਭਾਰਤੀ ਐਥਲੀਟ ਨੀਰਜ ਚੋਪੜਾ ਨੂੰ ਵਿਸ਼ਵ ਪੱਧਰ ’ਤੇ ਪ੍ਰਸਿੱਧ ਅਮਰੀਕੀ ਮੈਗਜ਼ੀਨ ‘ਟਰੈਕ ਐਂਡ ਫੀਲਡ ਨਿਊਜ਼’ ਨੇ 2024 ਵਿੱਚ ਜੈਵਲਿਨ ਥਰੋਅ ਵਿੱਚ ਦੁਨੀਆ ਦਾ ਸਰਵ ਸ੍ਰੇਸ਼ਠ ਪੁਰਸ਼ ਐਥਲੀਟ ਚੁਣਿਆ ਹੈ। ਪਿਛਲੇ ਸਾਲ ਓਲੰਪਿਕ ਖੇਡਾਂ ਵਿੱਚ ਪਾਕਿਸਤਾਨ ਦੇ ਅਰਸ਼ ਦਨਦੀਮ ਤੋਂ ਬਾਅਦ ਦੂਜੇ ਸਥਾਨ ’ਤੇ ਰਹੇ 27 ਸਾਲਾ ਚੋਪੜਾ ਨੇ ਕੈਲੀਫੋਰਨੀਆ ਸਥਿਤ ਮੈਗਜ਼ੀਨ ਦੀ 2024 ਰੈਂਕਿੰਗ ਵਿੱਚ ਸਿਖਰਲਾ ਸਥਾਨ ਹਾਸਲ ਕੀਤਾ ਹੈ। ਉਨਾਂ ਨੇ ਗ੍ਰੇਨਾਡਾ ਦੇ 2 ਵਾਰ ਦੇ ਵਿਸ਼ਵ ਚੈਂਪੀਅਨ ਐਂਡਰਸਨ ਪੀਟਰਸ ਨੂੰ ਪਛਾੜਿਆ ਹੈ। ਨਦੀਮ ਇਸ ਸੂਚੀ ਵਿੱਚ 5ਵੇਂ ਸਥਾਨ ’ਤੇ ਹਨ, ਕਿਉਂਕਿ ਉਨਾਂ ਨੇ ਓਲੰਪਿਕ ਤੋਂ ਇਲਾਵਾ ਸਿਰਫ਼ ਇੱਕ ਹੋਰ ਮੁਕਾਬਲੇ, ਪੈਰਿਸ ਡਾਇਮੰਡ ਲੀਗ ਵਿੱਚ ਹੀ ਹਿੱਸਾ ਲਿਆ ਸੀ, ਜਿੱਥੇ ਉਹ ਚੌਥੇ ਸਥਾਨ ’ਤੇ ਰਹੇ ਸਨ। ਪੈਰਿਸ ਓਲੰਪਿਕ ਵਿੱਚ, ਉਨਾਂ ਨੇ 92.97 ਮੀਟਰ ਜੈਵਲਿਨ ਸੁੱਟ ਕੇ ਸੋਨੇ ਦਾ ਤਗਮਾ ਜਿੱਤਿਆ ਸੀ, ਜਦੋਂ ਕਿ ਚੋਪੜਾ ਨੇ 89.45 ਮੀਟਰ ਨਾਲ ਚਾਂਦੀ ਤਗਮਾ ਜਿੱਤਿਆ ਸੀ। ਇਹ ਮੈਗਜ਼ੀਨ 1948 ਤੋਂ ਪ੍ਰਕਾਸ਼ਿਤ ਹੋ ਰਹੀ ਹੈ ਅਤੇ ਖੁਦ ਨੂੰ ਖੇਡਾਂ ਦੀ ‘ਬਾਈਬਲ’ ਮੰਨਦੀ ਹੈ ਅਤੇ ਇਹ ਹਰ ਸਾਲ ਵਿਸ਼ਵ ਅਤੇ ਅਮਰੀਕਾ ਦੀ ਰੈਂਕਿੰਗ ਵੀ ਪ੍ਰਕਾਸ਼ਤ ਕਰਦੀ ਹੈ ਜਿਸ ਵਿੱਚ ਨਾਂਅ ਆਉਣਾ ਵੱਡੇ ਮਾਣ ਦੀ ਗੱਲ ਹੁੰਦੀ ਹੈ।