ਹਾਲੀਵੁੱਡ ਤੋਂ ਦੁਖਦਾਈ ਖ਼ਬਰ: ਮਸ਼ਹੂਰ ਅਦਾਕਾਰਾ ਹੇਡਨ ਪੈਨੇਟੀਅਰ ਦਾ 36 ਸਾਲ ਦੀ ਉਮਰ ਵਿੱਚ ਦੇਹਾਂਤ

ਲਾਸ ਐਂਜਲਸ/ਪੰਜਾਬ ਪੋਸਟ
ਹਾਲੀਵੁੱਡ ਅਤੇ ਟੈਲੀਵਿਜ਼ਨ ਜਗਤ ਤੋਂ ਇੱਕ ਬੇਹੱਦ ਦੁਖਦਾਈ ਅਤੇ ਹੈਰਾਨ ਕਰਨ ਵਾਲੀ ਖ਼ਬਰ ਸਾਹਮਣੇ ਆਈ ਹੈ। ਪ੍ਰਸਿੱਧ ਅਮਰੀਕੀ ਅਦਾਕਾਰਾ ਅਤੇ ‘ਹੀਰੋਜ਼’ ਤੇ ‘ਨੈਸ਼ਵਿਲ’ ਵਰਗੇ ਚਰਚਿਤ ਸ਼ੋਅਜ਼ ਨਾਲ ਘਰ-ਘਰ ਪਛਾਣ ਬਣਾਉਣ ਵਾਲੀ ਹੇਡਨ ਪੈਨੇਟੀਅਰ ਦਾ 36 ਸਾਲ ਦੀ ਉਮਰ ਵਿੱਚ ਦੇਹਾਂਤ ਹੋ ਗਿਆ ਹੈ। ਉਹ ਆਪਣੇ 37ਵੇਂ ਜਨਮਦਿਨ ਤੋਂ ਮਹਿਜ਼ ਕੁਝ ਦਿਨ ਪਹਿਲਾਂ ਹੀ ਇਸ ਫ਼ਾਨੀ ਸੰਸਾਰ ਨੂੰ ਅਲਵਿਦਾ ਕਹਿ ਗਏ।
ਪ੍ਰਾਪਤ ਜਾਣਕਾਰੀ ਅਨੁਸਾਰ ਅਦਾਕਾਰਾ ਨੂੰ ਅਮਰੀਕਾ ਦੇ ਸਾਊਥ ਕੈਰੋਲੀਨਾ ਦੇ ਗ੍ਰੀਨਵਿਲੇ ਵਿਖੇ ਇੱਕ ਰਿਹਾਇਸ਼ ‘ਤੇ ਬੇਹੋਸ਼ੀ ਦੀ ਹਾਲਤ ਵਿੱਚ ਪਾਇਆ ਗਿਆ ਸੀ। ਐਮਰਜੈਂਸੀ ਸੇਵਾਵਾਂ ਨੂੰ ਮੌਕੇ ‘ਤੇ ਸੱਦਿਆ ਗਿਆ ਅਤੇ ਉਨ੍ਹਾਂ ਨੂੰ ਬਚਾਉਣ ਦੀ ਪੂਰੀ ਕੋਸ਼ਿਸ਼ ਕੀਤੀ ਗਈ, ਪਰ ਮੌਕੇ ‘ਤੇ ਹੀ ਉਨ੍ਹਾਂ ਨੂੰ ਮ੍ਰਿਤਕ ਐਲਾਨ ਦਿੱਤਾ ਗਿਆ। ਗ੍ਰੀਨਵਿਲੇ ਕਾਉਂਟੀ ਦੇ ਕੌਰਨਰ ਦਫ਼ਤਰ ਅਤੇ ਸਥਾਨਕ ਪੁਲਿਸ ਨੇ ਇਸ ਗੱਲ ਦੀ ਪੁਸ਼ਟੀ ਕੀਤੀ ਹੈ ਕਿ ਮੁੱਢਲੀ ਜਾਂਚ ਦੌਰਾਨ ਸਰੀਰ ‘ਤੇ ਕੋਈ ਵੀ ਸੱਤ ਜਾਂ ਸ਼ੱਕੀ ਹਾਲਾਤ ਦੇ ਨਿਸ਼ਾਨ ਨਹੀਂ ਪਾਏ ਗਏ ਹਨ। ਮੌਤ ਦੇ ਅਸਲ ਕਾਰਨਾਂ ਦਾ ਪਤਾ ਲਗਾਉਣ ਲਈ ਪੋਸਟਮਾਰਟਮ ਅਤੇ ਟੈਕਸਾਲੋਜੀ ਰਿਪੋਰਟਾਂ ਦੀ ਉਡੀਕ ਕੀਤੀ ਜਾ ਰਹੀ ਹੈ।
ਅਦਾਕਾਰਾ ਦੇ ਪਿਤਾ ਐਲਨ “ਸਕਿੱਪ” ਪੈਨੇਟੀਅਰ ਵੱਲੋਂ ਇੱਕ ਬਿਆਨ ਜਾਰੀ ਕਰਦਿਆਂ ਉਨ੍ਹਾਂ ਦੀ ਮੌਤ ਦੀ ਪੁਸ਼ਟੀ ਕੀਤੀ ਗਈ ਹੈ। ਪਰਿਵਾਰ ਨੇ ਆਪਣੇ ਬਿਆਨ ਵਿੱਚ ਕਿਹਾ, “ਬਹੁਤ ਹੀ ਡੂੰਘੇ ਦੁੱਖ ਨਾਲ ਸਾਨੂੰ ਸਾਡੀ ਪਿਆਰੀ ਹੇਡਨ ਦੇ ਅਚਾਨਕ ਵਿਛੋੜੇ ਬਾਰੇ ਦੱਸਣਾ ਪੈ ਰਿਹਾ ਹੈ। ਉਹ ਇੱਕ ਅਜਿਹੀ ਰੌਸ਼ਨੀ ਅਤੇ ਕੁਦਰਤ ਦੀ ਤਾਕਤ ਵਰਗੀ ਸੀ ਜਿਸ ਨੇ ਆਪਣੇ ਆਲੇ-ਦੁਆਲੇ ਅਤੇ ਸਕ੍ਰੀਨ ‘ਤੇ ਕਰੋੜਾਂ ਦਰਸ਼ਕਾਂ ਨੂੰ ਬੇਅੰਤ ਪਿਆਰ ਤੇ ਖ਼ੁਸ਼ੀਆਂ ਦਿੱਤੀਆਂ।”
ਜ਼ਿਕਰਯੋਗ ਹੈ ਕਿ ਹੇਡਨ ਪੈਨੇਟੀਅਰ ਨੇ ਬਚਪਨ ਤੋਂ ਹੀ ਅਦਾਕਾਰੀ ਦੀ ਦੁਨੀਆ ਵਿੱਚ ਕਦਮ ਰੱਖ ਲਿਆ ਸੀ ਅਤੇ ਵਿਗਿਆਨਕ-ਕਲਪਨਾ ਲੜੀ ‘ਹੀਰੋਜ਼’ ਵਿੱਚ ‘ਕਲੇਅਰ ਬੇਨੇਟ’ ਅਤੇ ਸੰਗੀਤਕ ਡਰਾਮਾ ‘ਨੈਸ਼ਵਿਲ’ ਵਿੱਚ ‘ਜੂਲੀਅਟ ਬਾਰਨਜ਼’ ਦੀ ਭੂਮਿਕਾ ਨਾਲ ਅੰਤਰਰਾਸ਼ਟਰੀ ਪ੍ਰਸਿੱਧੀ ਹਾਸਲ ਕੀਤੀ ਸੀ। ਉਨ੍ਹਾਂ ਨੇ ਹਾਲ ਹੀ ਵਿੱਚ ਆਪਣੀ ਆਤਮਕਥਾ ਵੀ ਰਿਲੀਜ਼ ਕੀਤੀ ਸੀ ਅਤੇ ਜੀਵਨ ਦੇ ਲੰਬੇ ਸੰਘਰਸ਼ਾਂ, ਡਿਪਰੈਸ਼ਨ ਅਤੇ ਨਸ਼ੇ ਦੀ ਲਤ ਤੋਂ ਬਾਹਰ ਆ ਕੇ ਨਵੀਂ ਸ਼ੁਰੂਆਤ ਕਰਨ ਦੀ ਗੱਲ ਕਹੀ ਸੀ। ਉਨ੍ਹਾਂ ਦੀ ਬੇਵਕਤ ਮੌਤ ‘ਤੇ ਹਾਲੀਵੁੱਡ ਕਲਾਕਾਰਾਂ ਅਤੇ ਪ੍ਰਸ਼ੰਸਕਾਂ ਵੱਲੋਂ ਡੂੰਘੇ ਦੁੱਖ ਦਾ ਪ੍ਰਗਟਾਵਾ ਕੀਤਾ ਜਾ ਰਿਹਾ ਹੈ।